賴清德（粵拼：laai6 cing1 dak1，英文：William Lai，1959年10月6號—）係中華民國政治人，民主進步黨成員，曾任中華民國副總統，現任中華民國總統。做過立法委員、臺南市市長、行政院院長。
事跡
賴清德2010年開始做臺南市長，2014年連任。2017年9月8號，棄臺南市長嘅職位，北上臺北接任中華民國行政院院長。
佢喺2020年中華民國總統選舉入面，參與咗民進黨黨內初選，一度有意挑戰競逐連任嘅黨友蔡英文但落敗，但之後作為蔡英文副手出選，2020年1月11號，當選副總統。
2023年4月12號，賴清德獲得民進黨提名參選2024年中華民國總統選舉；11月20號，佢同副手蕭美琴前往中央選舉委員會登記。2024年1月13號，賴清德以40.05嘅得票率當選總統，係中華民國首個具有醫師專業同埋副總統身分競選成功嘅總統。與此同時，民進黨以連續三屆執政創下自1996年中華民國總統選舉以嚟政黨連屆執政嘅最長紀錄。
爭議
身為台南市長拒絕進入議會接受質詢被彈劾
喺2014年台灣地方選舉，賴清德當選台南市長，但之後國民黨李全教當選咗做台南市議會議長。之後，李全教被控涉及賄選，賴清德就以呢個為理由宣布唔會進入議會接受市議員質詢，結果多次被市議會移送行政院同監察院調查同埋彈劾。國民黨市黨部主委謝龍介亦批評，從來冇一個地方首長會好似賴清德咁深入干預地方議會選舉，唔單止有失民主政黨嘅格調，也有失民主風度。監察院去到2015年8月5號，通過對佢彈劾，批評佢建立惡例，動搖民主社會核心價值，但賴清德反而批評監察院濫權。去到同年8月28號，賴清德話自己取得階段性成果，終於進入議會作施政報告]。
形容部分職業為功德被批評爭議
賴清德唔止一次形容某啲職業係做功德，比某啲人揶揄為「賴功德」。 其中喺2017年11月24號，賴清德喺一個公開活動入面提到照服員雖然薪水得3萬元，同工作內容相比好似唔划算，但就當「功德台灣」，應該呢份工作當做善事，結果俾唔少網友批評，媒體人兼學者管中祥就指佢將政府責任推卸去到做功德嘅層面，揶揄佢係「功德院、賴功德」。佢之後回應話，贊成長照員加人工，之後媒體將佢嘅意思過份簡化。
指控男男同性戀係愛滋病源頭被批評
喺2017年9月22號，本身係醫生嘅賴清德，喺一個表揚醫療工作人員嘅活動入面，話感染愛滋病嘅主要來源唔係共用針筒，而係由男男同性戀所引起。有網民批評佢恐同、反同、黑同，亦有網民擔心，賴清德嘅錯誤發言，會引發更多人網路霸凌同志。佢之後回應話，只係想講得獎人之一顏純左推動使用乾淨嘅針筒，大大降低由針筒傳遞嘅愛滋病得病率，話自己無不敬。